【高清專欄】唔睇世界盃，除非……

自從1998年的決賽，巴西決賽零比三輸給法國，高清再沒有捱更抵夜收看世盃的現場直播，因為歐洲聯賽比世界盃精采得多。

本以為從此與世界盃割席，萬料不到，因工作關係，要為現場直播做評述，再度捱到一雙熊貓眼，與世界盃重拾舊歡。

及至2014年那一屆，巴西與德國爭決賽入場券，戰果竟然是七比一，巴西輸到離行離列，氣得高清幾乎要發毒誓唔睇世界盃。

幸好當年沒有發毒誓，否則實比雷公劈，因為加拿大的「快樂足球」戰術，談談笑笑，嘻嘻哈哈，竟然無牽無掛打了入決賽周。

雖然沒發誓，唔會被雷劈，但是自己的國家隊出戰決賽周，如果唔做啦啦隊捧場打氣，實被人噓死。

世界盃的表現為甚麼一屆不如一屆？綜合各界評論，原因有三。

一：每隊國家隊，都是選本國各個強隊的精英集合而成，說得難聽是拉雜成軍，欠缺默契，未能發揮TEAM WORK的實戰力。

二：球皇球星的身價極高，若領了紅牌或受傷，嚴重影響球隊搵真銀的戰鬥力，這個後顧之憂，縱有一夫當關，萬夫莫敵之勇，如果他們留力，大家也應諒解。

三：賭外圍波的注碼大得驚人，如果強隊輸七比零給弱隊，甚或比數更大，能重注獨羸的話，會是甚麼人？

最近十幾年的世界盃，精采不及早年，是否與上述三點評論有關？觀音菩薩黃大仙都答唔到你也。