即時娛樂
2023-03-30 19:22:47
星8卦丨「朱女」嫩妻妒忌心重 管制「阿叔」與世界隔絕
娶個靚妻係咪人人羨慕？又靚又嫩就更加係人生勝利組？有時啲嘢又唔一定㗎！視乎個女人有幾鍾意你啦！
以「阿叔」為例，40幾歲成家，之前同「姣精」都好多年，對方以為「阿叔」係不婚主義，搞得幾年都唔想再蹉跎歲月，跟咗「大佬」做二奶，但起碼唔愁生活。男人通常都係死喺啲後生女身上，「朱女」其實樣樣都普通，但勝在好命，出道好快就做主角，因為一次外景，「朱女」覺得「阿叔」夠穩重，輕輕用下力就因為青春無敵將「阿叔」拿下，仲要唔駛半年就拉埋天窗，好多人都覺得匪夷所思。
其實婚後「阿叔」先知「朱女」妒忌心好重，本嚟北上大把財路，「朱女」全部唔畀接，話上面啲閒花野草好得人驚，所以要老公留港發展，最弊香港無job呢，男人最怕無志氣，於是「朱女」豪氣話等我養你，果然佢一個月做網紅代言都有幾十萬，叫做夠養起頭家。
「朱女」係屋企都好霸道，唔可以畀老公喺自己面前消失多過5分鐘，去廁所唔准帶電話，電話又唔畀set密碼，有人打嚟就問長問短邊個嚟㗎？出去食飯有乜嘢人？仲有大部分時間係跟埋去飯局，知道飯腳係邊個之後，坐低唔夠半個鐘就話要返屋企湊仔，拉埋「阿叔」走，搞到佢尷尬非常。依家大家知道阿嫂超級煩，所以都唔敢再約「阿叔」，無朋友無嘢做嘅男人，係咪會為一個好愛自己嘅女人忍成世？大家放長雙眼睇下點！
【相關文章】：
星8卦丨「家姐」姣媾裙腳仔連生兩個得米 避開「勢利老竇」自保
星8卦丨「男歌手」食仔被老婆發現離婚 放縱繼續男女通殺專搞助手