陳奕迅自爆停騷三年等到冇乜dream 晚晚瞓覺驚自己一睡不起
《陳奕迅Fear and Dreams香港演唱會》昨晚於紅館開鑼，個唱由黑暗迷離氣氛，漸變為歡樂繽紛，Eason懾人歌聲，加上舞蹈員的怪異及誇張造型，配合紅館史上最巨型電子屏幕的畫面，以及煙花效果，極具視聽享受。Eason演唱《任我行》時，台頂吊下一紅一藍汽球，他拿起汽球，笑着向觀眾派心。其後，獻唱金曲《與我常在》和《忘記歌詞》，全場站立氣氛熱烈，台下太太徐濠縈與女兒、舒淇和馮德倫也起身揮手舞動。不過之後Eason唱《七百年後 》和《我們萬歲》兩度「甩嘴」，演唱《幸福摩天輪》時，Eason拿起紙巾抹耳仔，汗流滿面地說：「唔好意思，啲水入咗去耳窿度驚電親。」他除去一隻耳機表示要聽一下現場反應，全場大叫，他即說：「嘩！咁正！好想錫晒你哋！」
【相關閱讀】：
陳奕迅個唱用紅館破紀錄巨Mon極震憾 徐濠縈病癒撐場18歲女罕露面雙眼似足媽媽
陳奕迅演唱會狂洗版網民五大焦點！18歲囡囡康堤搶鏡 粉絲鏡頭下Eason肥一圈？
Eason唱足全場，一直沒正式開腔說話，他向台下觀眾笑說：「我唔suppose同你哋講嘢，破壞晒我計劃。」唱到大約十點半時表示最後一首歌，觀眾大叫「吓！」唱罷，他才開口表達這三年來的感受：「我唔係懶有型，真係搵唔到個位講嘢。呢3年匿埋，18年度呢個騷…我唔係冇嘢講，我好多嘢講，但想留番啲氣唱歌。度呢個騷想講嘅嘢太多，本來度咗稿，但永遠唔work講唔到，太開心有你哋歡呼和支持聲，好正好好聽，最想講嗰句『多謝你哋！』我唔習慣同人分享heavy嘢，除咗唱歌。」此時有女觀眾大叫「我愛你！」他笑說：「以我性格，男人都會錫埋去。好開心同大家spend時間，最好禮物係spend time with each other，好感動。」
Eason續說可能年紀大了很容易喊，以前一直工作沒停過，沒時間去思考：「呢個騷三年前停咗，有一樣嘢卡住咗，喺度等唔知做乜…就係因為有時間等，就諗嚟諗去，愈諗愈驚…覺得使唔使咁應個騷Fear and Dreams，已經都冇乜dream…想攬下掂下都唔得，唔係唔信你，係唔信我，驚我係帶菌者。」Eason又自爆恐怕自己一睡不起，「我只想做呢個騷，等到個人好驚，驚到一個地步係瞓覺之前，驚第二日起唔到身，如果起唔到身有咩要交代？電話password話畀邊個聽？銀行啲錢使唔使捐咗去？畀邊個？ 愈諗愈多，唔知點解會驚。唯一個辦法就係唔諗，所有嘢控制唔到。我以前就係咁…唔關我事，其實到依家我都唔知件衫點解會係咁，靚唔靚由你哋講，所以好多嘢唔諗。講完咁多，唔好諗唔好講，好好享受，最緊要係呢一刻，先係最真實。」Eason站在升降台上唱連串快歌，全場氣氛高漲，最後encore獻唱《遊離份子》，不過Eason指着耳機似乎出現問題。