頭條戲場丨《壯志凌雲：獨行俠》100分的續集

對於相隔36年的續集評價，「好睇，真係好好睇。」麻煩有得揀請睇IMAX，由開場一分鐘開始已經相當好J，澎湃又刺激嘅空戰加飛行場面睇到好爽，其實將一套本身已經係神級嘅作品出續集已經唔容易，湯告魯斯(Tom Cruise)做到，仲要做得好成功，認真恭喜晒。(剛上映) 撰文:廖思慧

戲中大量空戰場面，包括教學班及真正任務，幕幕好睇到癲。

1986年的《壯志凌雲》，只有湯告魯斯一個人喺戰機應付到拍攝，即係仲可以擘大眼講到對白。今集就唔同嘞，湯告魯斯為追求全實感，要求每位戰機師演員都要在高空飛行的F-18戰機內完成拍攝。所以眾演員開機前都花咗5個月進行密集訓練，以克服高速飛行的重力變化。如非必要都唔會用CG嘅湯告魯斯講過：「觀眾會睇到、感受到，你絕對假裝不了。」

湯告魯斯表演賽
外號「獨行俠」的麥彼得（湯告魯斯飾）臨危受命，要返回自己出身的飛行學校擔任教官，教一班精英點喺有限時間完成超艱巨任務，就係需要以低空極速穿梭迂迴曲折的山谷之間，反應慢啲都會撞山。精英當中嘅「公雞」畢伯利上尉（米爾斯泰勒飾），係已故戰友「野鵝」嘅囝囝，麥彼得同佢及舊愛萍妮（珍妮花康納莉飾）最有情感交流，一個有仇一個有愛，另外傳承亦是本集主題重心。

「公雞」飛行技術出眾，但因為一件事好唔妥「獨行俠」，對於仇人做教官周身唔聚財。

「公雞」好受歡迎，呢幕又彈又唱令到「獨行俠」好感懷，因為首歌有啲嘢囉。

Glen Powell飾「劊子手」，特訓戰機師之一，擁有極好駕駛技術，但為人招積又缺乏團隊意識。

Jon Hamm飾「旋風」，海軍中將，負責管理飛行學院，由不滿「獨行俠」到好佩服。

Monica Barbaro飾「鳳凰」亦是特訓戰機師，全片最靚。

片長2小時17分鐘，有回憶有致敬有感動亦有笑位，冇過份沉溺舊時，高潮位多到數唔到，片尾緬懷首集已逝導演Tony Scott竟然有啲眼濕。最後，59歲嘅湯告魯斯仍然走得好快，要好好保育佢呀。

進行飛行拍攝時，演員要承受高達8倍重力，湯告魯斯爆料指有演員辛苦到嘔。

麥彼得同萍妮拍拖好好玩，又揸電單車又揸船仲飛埋上天。

更多新冠疫情資訊，請到以下專頁瀏覽（按此）