頭條獨家丨杜琪峯同長輩講到停唔到口 小店食午餐洩養生秘密

電訊盈科所成立的新公司MakerVille於上月尾舉行發佈會，會上除咗播出由杜琪峯、游乃海及朱淑儀任監製的電影《命案》預告外，其中一個環節由谷德昭擔任主持，同鄭保瑞及杜琪峯等傾偈。雖然60有7，但杜Sir貼地又搞笑，談笑風生勁得網民歡心。採訪:娛樂組

每逢鄭秀文生日都會見到杜Sir兩公婆及古天樂同Sammi慶祝，最難得年近70，但杜Sir都Keep住鋼條身形，有腰有頸，真係唔容易㗎，最緊要塊面冇鬆弛，企埋班後生仔身邊一啲都唔輸蝕。

一餐食兩條魚
杜Sir住西貢，街坊都成日見到杜Sir拖狗散步。日前下午，着住巴塞隆拿球會運動外套及同色系運動褲嘅杜Sir，同一位女性長輩現身西貢巷仔，一間有點心同盅頭飯食嘅小店食Lunch，睇佢裝扮應該做完運動。報料街坊表示，「佢有食菜同盅頭飯，蒸咗兩條魚，間小店冇魚賣，應該自己拎嚟再叫小店蒸。」究竟要有幾鍾意食魚先會一餐飯食兩條魚?或者係佢養生Keep Fit之道，街坊仲話佢同長輩好好傾，邊食邊傾冇停過，但講咩就真係聽唔到嘞。

更多最新疫情資訊，請到以下專頁瀏覽 按此