欣宜返成長地玩鞦韆 強調快樂好簡單勿忘初衷

鄭欣宜（Joyce）在早前的商台頒獎禮上，首度贏得「叱咤樂壇女歌手」金獎及「我最喜愛的女歌手」，問到慶祝方式，欣宜話頒獎禮翌日返咗去成長地九龍城，同老友一齊食兒時最愛嘅牛肉餅及酥皮蛋撻慶祝，更去咗舊居附近嘅公園玩鞦韆。當時欣宜話呢個慶祝方式好特別又難忘：「係一個好落地嘅慶祝方式，好似係承認、接受同擁抱我嘅過去，呢啲嘢係必經，先會有今日嘅自己。所以1月2日用呢個方式慶祝係好有意義。」

講咗半個月，終於有欣宜玩鞦韆嘅片，不過由於段片喺夜晚拍攝，所以都唔係好睇到欣宜五官，全片得短短三秒但睇佢用力撐上嘅動作都Feel到佢玩得有幾開心。欣宜留言，「回到小時候屋企隔離個小公園玩：簡單的快樂勿忘初衷。」

另外，因為第五波疫情，好多藝人嘅工作都要取消，但欣宜都無偷懶努力練舞，仲Hashtag跳舞使我快樂，快樂就好嘞。

立即下載 | 全新《星島頭條》APP : https://bit.ly/3yLrgYZ