【曾智华专栏】伍鹏志被追到气咳

今个马季，冠军骑师根本冇得斗，由「软硬鞭」潘顿只手遮天，无他，骑功佢高晒，好马佢霸晒，绝对打横行，巴闭到「去唔去你都吹佢唔胀」境界。上周六又表演，话之马迷问候佢祖宗十八代！
　　
不过，冠军练马师之争则越来越白热化，因已入直路而胜负仍难料。
　　
小弟早指出，虽然伍鹏志季初放纸鸢，希望以「大逃」放甩对手，有冇咁顺摊？冇！因一睇马房阵容，伍厩可用的马已W得七七八八，但新兵源质素输吕健威及蔡约翰半班，尤其吕健威，有十几只冚手新马未用，一揿掣即可能大爆发。
　　
伍鹏志心急，所以次次都狂报名。呢呢，今晚又正副选场场报，摆明杀得几多杀几多。究竟佢领先优势能否挨到季尾？我预测——No！今届冠军应是吕健威。马季仍有不足三个月，答案好快揭盅。
　　
今晚赛事，研究第二班一千米短途，由最高分讲起。
　　
「状元及第」（100分），前季亮相，乃快活谷千米之星，三W。但上季中开始转型，告东尼改为安排佢跑沙田一千米。今季交出一W后，已升到102分，要坐马监嘞。
　　
「韦小宝」（99分），近况甚差，又非一千马。
　　
「紧张大师」（99分），前季快活谷一千米极出色，上季落脚转慢，改跑沙田。上月在沙田一千米偷咗一W，又系要坐马监。
　　
「四季醒」（94分），季初此程一W后，已久没表现，状态低沉，唔要。
　　
「电气骑士」（91分），今场回跑特擅途程，必须尊重。
　　
「当家精神」（86分），顶多P，边线。
　　
「人和家兴」（84分），上仗W完加八分，有排减分。
　　
「雪勇神驹」（83分），唔使睇。
　　
「财才」（80分），最低分，但今季同程两W两Q一P，全入三名，必须尊重。
　　
「财才」、「电气骑士」及「当家精神」互串。