【曾智华专栏】杀上汕头狂食牛

香港虽曰是个自由港，理论上全世界美食皆在此买到，如有问题，本应只得一个⋯⋯你有冇钱先？
　　
实质呢？绝非如此！
　　
举例，大湾区的山水滑豆腐，香港有冇？冇！我问过N间食肆负责人，为乜唔运落嚟卖？内地客家煎酿滑豆腐，三十人仔左右，若香港有售，肯定值超过八十元！
　　
但冇就系冇，我要食，一如汕头牛肉、普宁豆腐、手打弹牙鲜牛丸⋯…必须亲到当地！
　　
上周又再杀上汕头，其实有点烦，因要事先扑高铁飞（如今天天一票难求），再订酒店。到日子，来回五个几钟，周车劳顿。
　　
值得吗？人人价值观不同，对我来说，「抵挨」！留低三日两夜，尽情食食食？
　　
早年到汕头，食牛肉火锅，有名又有水准的，来来去去三几个连锁集团。一般装修又旧又残，空调不足，卫生麻麻。虽然牛肉正、价钱平，但整体感觉就是大有改善空间。
　　
幸而随着大量游客涌入，市场高速膨胀，令投资者纷纷杀出。于是近年一间又一间由设计到装修，再到服务及卫生高水准的牛肉火锅，渐次出现。
　　
出发前托老友「汕头S」介绍，佢锁定一间新店名「潮庭」，卖点当然即日新鲜㓥的牛肉。更重要安排一人一锅，不用似旧式店般人人「队」对筷子入同一个锅，搞到「口水交融」。此外，更强调汤底用山泉水。
　　
入到去，哗，东主果然有生意头脑，竟拉得美国最大汽水品牌可乐联手，大大个牌宣传：「一口牛肉一口可乐，太幸福喇！」以及：「火锅配可口可乐，美味欢聚更快乐！」
　　
宣传有冇影响到小弟？冇！我当然红酒配牛肉啦，小朋友咩，饮汽水！
　　
最重要，牛肉得唔得先？
　　
我从未试过在汕头食牛肉有唔得的！