【曾智华专栏】抢律师

香港行行爆人才荒，不少做管理的老友搞笑说：「碌Sir，香港开埠以来，从未试过如此，做打工仔，个个如今可以畀面色老板、上司睇嘞，因东家唔打，立即可以打南西北家，分分钟仲会加人工。所以，唔系夸张，不少工种一有人见工即请，但求对方识『呼吸』，顶住先！」
　　
以上一半讲笑，一半讲真。尤其餐饮、清洁及保安，从未见有如此狂大的流动性。
　　
专业岗位又如何？一样！特别是教师、社工及NGO内的所有工种。听讲唯一好少少为医生，因在香港个个属「天之骄子」，但一踏出本城，极难在其他国家揾到接近的薪酬，更何况必须纳重税？
　　
小弟有幸已「收工」，唔使做管理及请人，但对「揾工跳糟」最新行情非常有兴趣，不时睇求职网及报章「揾米版」，睇睇有乜发现。
　　
呢呢，最近正正发现有一行也是抢人抢到飞起——律师！
　　
而出猛手抢人的竟是律政署，摆明去到非常之Desperate，大力呼吁各位人才唔该快快应征！
　　
点解咁？唔知，可能是原本署内的律师大量流失，出外「捞」或移民啩。也有可能呢几年工作量大增，因早前积落的案要清。无论如何，就是打晒锣揾人，只要你肯参加律政司的「律政人员计划」，咁你在其他部门工作也好（向政府内部及公营机构抢！），读紧大学也好，律政司都想抢；渴求到你明年甚或后年（2026年）才取得法学专业证书的，也想「落钉」！
　　
出手如何？开波就月薪60,065元至62,895元。即你在专上学院一毕业，就年入七十多万元！相信除医科外，绝难有大学毕业生如此「身娇肉贵」？
　　
不过，律政司咁搞法，会否抢尽所有新毕业律师仔而将私人市场人才完全扯干？我好想知！