【曾智华专栏】《金像奖》出闸大脱脚

第四十二届《香港电影金像奖》上周公布提名，一睇入围名单，我打个突。为免自己偏见，立即用WhatsApp问几位老行尊点睇。原因？发觉不少入选的，一系唔合理，一系摆错位。
　　
结果各人回复大致与小弟感觉相同，也有个别「表示愤怒」的，声明：「今届弃权！我有我的专业标准，决定唔投票！」
　　
总之隐隐闻到少少火药味，有点道不同不相为谋感觉，究竟发生乜事？
　　
本栏读者皆知我是影痴，每周睇三套新上画电影，故此大部分入围电影皆睇过，早早内心有个评分表，边套及边个应该入选甚至得奖。
　　
岂料一睇公布，不期然要问：「喂喂，呢套候选最佳电影？呢个候选最佳男主角？呢套有机会赢最佳编剧？咁嘅质素候选最佳电影？唔系啩，今年班评审委员眼光奇怪啲噃！」
　　
我当然不想爆出边套或边个入选完全不合理啦，因要有少少保留，怕自己有「偏见」。
　　
睇名单，隐隐觉得其中有个考虑——要保证收视率，故虽个别人物唔够班或表演未达组别水平，照提名。
　　
多项提名中，最令大家服的为最佳女配角名单，个个起码有水准演出。
　　
另一为新进导演奖，全部令人眼前一亮，讲真，佢哋平均表现，比个别提名最佳导演者，更具水平及实力！
　　
整张名单中，最令人一睇弹起的，为影帝吴慷仁，竟只被提名最佳男配角。
　　
喂！各位评审，你哋有冇搞错？《但愿人长久》中，明明吴慷仁是独一无二男主角，如今你班友「监生」将佢大脚全中，兜咗去变候选男配角，究竟有乜盘算？系咪惊佢赢出而得罪其他「有势力人士」？呢个决定好难服众，也令今届金像奖出闸大脱脚！