【曾智华专栏】「最佳男主角」潘顿

睇「软硬鞭」潘顿骑马，可以拍案叫绝，冇得唔服佢骑功，尤其摄位功，但同时也可以令你谷到中风爆血管，因佢会突然变「澳门骑师」。
　　
上周日潘顿扫六W，尽显骑功！尤其骑两只排外档的「高进明驹」及「魅力知遇」，前者十二档，短途千二米，佢示范表演由外档「游」入内档的功架，简直是教材级。另外「魅力知遇」也是早段操控步速加忍住爆炸力，先混入马丛，入直路才拉出外档，逐步而上，横扫而W，拍烂手掌。
　　
当日赢的每只马皆不会放头，也不会留到尾变人马角力，全部顺住入弯才逼出马匹爆炸力，就此W完一只又一只。
　　
不过，老友，唔该你慢镜重播佢点输全港马迷认为冇得输、不少人瞓身的「金钻贵人」。阵上恍似突变成「澳门骑师」，全程进退失据，冇晒其他场次中的潇洒自如，由头开始混在马堆中，到入直路都似六神无主，唔识移位抽出，以发挥此马王的超人杀着力，奇！
　　
上周日赛事，有两项真的好冇瘾，一为再有骑师堕马。近期呢种「意外」越来越多，相信马会必定察觉，若成趋势，就要开独立调查小组了，人命马命皆关天呀！
　　
讲到冇瘾，当日另一大大遗憾事件，为只意头好到爆的「团结一心」，竟然要人道毁灭！以今时今日的香港气氛，发生单咁嘢，怎不无语问苍天？
　　
今晚快活谷当然马照跑。「软硬鞭」食饱饱后，都要让路比其他骑师开饭嘞？我专注研究「田鸡」及巴度，两皆高手，只睇几时郁手。
　　
以下几匹，胜出必有钱分，入P也会不俗，包括：「常常有余」、「剑山峰」、「论文」、「超额认购」、「皇帝英明」、「金哥儿」及「皇金风速」。一于七只玩掟飞镖，睇吓有冇得执！