【曾智华专栏】冷血极的载歌载舞

童年时老师及长辈一定教好多基本做人道理，例如在大庭广众前，应适当时候做适当的事，切勿只顾自己感受！
　　
今日我想讲乜？正是周三尾场赛事，转弯入直路时发生堕马意外，何泽尧骑的「浪漫风采」失蹄倒下，小何头先落地，郁都唔郁。
　　
正常人当然不会再理边只马点跑，只集中关心何泽尧伤势，因咁跌法可大可小也。
　　
好嘞，马匹终于冲过终点，由「无心睡眠」爆出二十三倍大冷，买中的当然肥过猪仔。
　　
我有冇中？中五蚊二重彩复式。但有冇欢呼？当然冇！因一心只希望镜头尽快影回何泽尧，睇睇佢伤势如何。结果一个Shot都冇，反而影住大群「会心微笑团体」因旗下马匹胜出而载歌载舞狂欢，大唱《无心睡眠》。
　　
相信正常观众当时反应，必与小弟一样：「喂，人哋安危未知，基本人性，唔关心都应该收敛吓啩，如今你成棚人咁鬼兴奋，非常之Anti-social啫，不得体了！」
　　
幸而最终小何四肢能动，应冇重伤，今次大步槛过，望尽快康复，阵上再展雄风！
　　
明日最瞩目当然为一级赛「百周年纪念短途杯」，总奖金一千三百万元，平磅当然冇人儍到会「玩假」。「金钻贵人」摆下擂台，抽五档，除非意外，边有得唔赢？「福逸」磨利换布文，当然心存大欲，一定要预佢！「好眼光」今场入脚易，W就难，P机会！
　　
睇进度，「幸运有您」相当理想，今季主攻千二米，上次一级赛入脚，输四分三马位，直路上被阻过，今次「金钻贵人」有乜闪失，分分钟佢坐正！呢场可以四只马复式二重彩，又或悭啲，以「金钻贵人」做复式胆。
　　
老友问小弟，母校团体只「坚又威」得唔得？休息不足一个月又再博，冇五倍W唔值！