【曾智华专栏】马会入市是重要讯号

股市跌到「淋冧冧」，我日日畀人问：「碌Sir，死啦，再咁跌落去，会否渣都冇㗎？系咪应该未变零前清仓呢？」
　　
大佬，点答呀？啲钱你嘅，若我叫你揸/沽，衰咗一定赖我（冇人会赖自己猪头炳的），所以，几大唔答，你自己决定啦。
　　
不过，小弟点做，就可公开：「我乃股神巴菲特忠实信徒。点解？因冇人投资股票够佢叻，讲完。所以，有两项纪律，长年紧跟：一、坚守价值投资法。只买有实实际际业绩、资产及前景的股票，绝不买『吹水股』，你讲到天花龙凤？留返你自己好了；二、别人贪婪我恐惧，别人恐惧我贪婪！」
　　
个人买卖股票几十年，乜都见过，包括指数跌到「鼻哥窿冇肉」，又或升到以为坐上火箭，从此再冇地心吸力。
　　
股市一如马场、赌场，从来九成人蚀、半成人打和，赚的是另外半成做庄的幕后决策者。
　　
我玩股票，只以「玩」的心态，绝不瞓身。真正瞓身的投资，只有自住单位！
　　
好嘞，答返班「腾鸡族」究竟应否出/入市？
　　
有个讯号极其重要，就是马会财神爷会否入市扫港股？马会存在，好多「社会功能」，包括制造就业机会、稳定社会情绪、收取天文数字税款及善款，此外，仍有一样，非常时期才出招——护盘。当股市跌个四脚朝天时，马会就会挥军入市，一来执平货，二来稳住个股市。
　　
每次马会入市，皆Timing精准兼中短期例必有斩获，大家留意可也。
　　
今晚玩泥沙，唔好玩都要玩，一于研究二班1650米。复式二重彩及Q胆选「禅胜宝驹」，此程专家，随时都可起筷，脚拖「保罗承传」，铁马，乜地都得，跑极唔残。冷选两只，「柏林探戈」此程赢过，减够分就郁手；「敏捷神驹」唔知乜料，拖埋！