【曾智华专栏】必须防止再一镬泡

写此稿时，环境及生态局局长谢展寰正在非常无奈地宣布，将全城垃圾征费开展日延至8月1日。这个公布对政府的威信有相当大的打击，因「话咗做而做唔到」，官场文化中，好大镬㗎！
　　
呢铺越睇越牙烟，睇嚟8月仍可能一镬泡，唔知点收科！
　　
先旨声明，小弟百分之一千支持环保及垃圾收费。事实每逢去到日本、韩国、台湾，都觉汗颜。点解人哋处处都可以做到「自己垃圾自己处理」，但香港人就是唔得、唔愿、唔做？我哋教育水平特别低？我哋修养特别差？唔系嘛？
　　
更甚，开关后去到大湾区城市，包括深圳、东莞、顺德，以至潮汕，大致基本搞掂，绝少再见到人随地抛垃圾、放飞剑，更遑论大小便了。昔日我哋笑人，可能好快倒转，真该煨！
　　
系咪香港人恶习冇得改？绝对唔系！事实眼见个个去到韩日台，全部会自动自觉入乡随俗。
　　
再者，曾经或现在已移民外地者，必会一Land就接受当地环保政策，火速做到垃圾分类，绝不会冇垃圾桶就嘈喧巴闭。
　　
我睇简单，因香港人在垃圾政策方面，长期纵坏晒，而政府也是懒懒闲，从来软手软脚，对犯法者从不认真检控，结果冇品香港人睬你都儍。
　　
好嘞，如今话要嚟真，要强制大家处理好自己垃圾，政府又推到步伐错乱。小弟认识的人，对这个政策内容多蒙查查，意即宣传严重不足！
　　
点解唔早早铺天盖地推「懒人包」，解答一切疑问？而系踢一下答一答，点掂呀？今次真系杀到嚟，临尾才鸡手鸭脚扑火。
　　
未来四个月，究竟政府有乜法宝拆局呢？嗱嗱，为免再孭大镬，今铺起码要政务司司长亲身跨部门统筹喇！