【曾智华专栏】《潜行》值得入场吗？

刘德华作品一套接一套上映，有点自己打自己，但冇乜问题，反正两套都非主要「睇佢」。
　　
《金手指》小弟认为刘德华继续扮演「刘德华」，冇乜惊喜，演技深度也不见。《潜行》又如何？今次身兼监制及主角，担子更重。成绩？还是让大家入场观看再评论。
　　
又系嘞，花一百几十元睇两个影帝（刘德华及林家栋）、一个影后（刘雅瑟）、一个超级靓仔（彭于晏）及一个超级动作设计专家（钱嘉乐），炒埋一碟美味菜式，虽然不算顶级，但从任何角度都收货啦。
　　
此片导演为关智耀，身兼摄影师，两个角色，明显摄影方面的功力高得多！
　　
难明刘德华要做监制，又决定选做片中的角色。论戏，佢有多场要与林家栋单对单斗演技，真系弊，明显差咗一班波，揾自己形象嚟搞！
　　
另外，刘德华一向以「永恒靓仔」形象出现，今次又弊，碰上一个如日方中的型仔美男彭于晏，不怕不识货，最怕货比货。在连场动作戏及大特写样貌时，又系嘞，点睇都蚀晒章㖞老友。
　　
可能华仔自己对自己的演技及「保鲜」大法，有过人的百分百信心啦。
　　
《潜行》整体成绩一般，但有几瓣特别值得欣赏。第一是钱嘉乐的动作设计，无论飞车、爆破及枪战，皆顶级荷里活水平。若有足够预算畀佢任玩的话，效果肯定更加不得了。
　　
另外，林家栋再一次示范影帝级演技，扮乜似乜，绝无刻意，不留痕迹，睇佢状态，幕前肯定有排去，成就必能再创高峰。
　　
少少遗憾是影后刘雅瑟，全片只是行行企企，毫无发挥机会，浪费大好演技，真的无奈。
　　
总结，《潜行》值得入场，但也有太多欠理想之处，未到A级水平，B级啦！