【曾智华专栏】要求/人工皆天咁高

过去两年香港人才「鸡飞狗走」，抢极都填唔返个大氹。单论令人人羡慕的铁饭碗（冇乜机会被炒）公务员，哗！原来去年超过一万人离职，当中约四千人自己「唔玩」。最令人侧目为一向被视为天子门生，随时可以升到做特首的AO职系，竟有破纪录的三十六人辞职。
　　
AO乃制定政策者，也是管治的骨干，咁多人「起身」，你话冇影响就呃人。
　　
栽培一个AO，由新丁到首长级，虽不是天文数字，但几百万元至上千万元冇乜走鸡！咁就拍拍屁股走人，究竟点解？公务员事务局有冇一个详尽分析？再谂方法补救呢？
　　
其实单看薪酬数字，新丁AO的水平真系高得「惊人」。这点，时事评论员黄丽君上周已大大声指出，实在太过「坚离地」。
　　
究竟几多？一上工就月薪超过六万蚊！乃一般大学毕业生平均薪酬的三倍半！
　　
若果比起三十年冇加过人工的「传媒人」（电视电台报纸），更是惊人的四倍或以上。
　　
同是大学毕业，可能来自同一系，甚至可能智慧及办事能力相若，一起步就差四倍？
　　
黄丽君大喊「坚离地」，也不是冇理由。更甚是基本上公务员人工年年加（除特殊三两年外），有升就冇降，如此，AO就与外边世界的薪酬水平越拉越远了。
　　
其实较公平是将入职基数调低，然后有表现时升级，再调高薪酬，更具鼓励性。
　　
人比人，加上先天妒忌心，故历年AO都被不少外人及同事针对，背后揶揄：「AO㖞，收咁高人工，有乜本事先？唔该骚Quali！」我唔想听到及见到，但也觉反应正常。不过，当你羡慕AO高人工时，却不少选择离职，点解？相信份工「有冇意义」远比多三两万元重要！