【曾智华专栏】你上咗船先啦

家居周围近年出现N个新楼盘，一个又一个落成，十年之内面对市场风云变色。十年前，皇帝女，个个豪宅盘抢到飞起，排大长龙再限购，好似买到单位等于执到一吨金。
　　
不过，时移世易，发展下去，个市慢慢变「谢老四」，发展商改变策略，狂「𠱁」买家上车，总之你上咗先啦老友。
　　
当中一招，几年前已听到地产代理周围贴街招——三年白食白住！
　　
老友，口号真系好震撼㖞。不过，你估我未戒奶BB咩？白住？好奇之下，唔买都多口问问。
　　
哦⋯⋯原来条「桥」系叫你先付三成首期上车，然后「白住」三年，之后再付埋其他费用。
　　
系咪好吸引呢？因为买一般物业，你畀完三成首期，仲要即供。如今引咗你上车先，再𠱁你：「三年后，可能楼价继续升，到时沽货赚钱又得，再按，银行估价都高啲啦！快啲买啦，好嘅单位极之抢手，转头已经冇晒㗎喇！」
　　
听落的确笋，搞到不少买家心思思，决定「白食白住」三年，怀有到期后升值之望。
　　
有位老友正正受「先住后付」计划吸引，满心欢喜三年前上车。结果，你知我知发生咗乜事，间「白住楼」不停贬值外，更因要「为下代」，决定移民英国，点搞？间楼价值冇咗两成几，银行又越估越低，「白住」完后要上会，抬钱每月供十几二十万元⋯⋯
　　
结果把心一横，忍痛挞订去也，感觉就是成颈血。但资本主义社会，食咗咸鱼要抵渴！
　　
这种「先住后付」的「𠱁」你上车计划，如今仍然继续，愿者上钓，仍有大量地产商推出，也有不少希望「白住」者接纳，三年后如何？各安天命。　
　　
最近又有一个豪宅盘交托经纪猛Sell：「五折，银行唔做按揭，只收现金！」
　　
咁笋，肯定魔鬼在细节啦！