【曾智华专栏】闻到味嘞

今日标题可有引起你好奇，问：「喂喂，究竟闻到乜味呀？」
　　
我闻到阵阵「招味」，系出招个招呀！边个出招？政府，终于出招「搞」地价嘞，因已烧埋身。
　　
政府出乜招？睇发展局局长宁汉豪公布今季仅推一地就知，将会逐步用缩减供应来「影响供应」，托住地价，以免变插水，同时希望稳住楼价，否则负资产潮一爆，即会火烧连环船。
　　
睇嚟减少推地只是第一招，若冇效，重招必陆续有来，包括撤去买第二间楼的辣招，更分分钟曲线重新欢迎内地同胞到港「炒楼」！
　　
当然更可以高调宣布搁置「万众嘘爆」的「明日大屿」计划。
　　
只要一讲，肯定个市必似食咗镇静剂，因唔使再惊未来日子会有无数地皮涌出，将市推冧！
　　
香港人善忘，另年轻人可能根本唔知，1998年至2003年，政府睇住个楼市冧，吓到鼻哥窿冇肉。因政府库房收入，地产乃主要支柱。地产冧，全城财富效应蒸发，市民唔开心，政府冇收入，点搞？于是决定落重药，由负责的局长孙明扬度狠「桥」，将供应一嘢「炼」谢，有即时效果，但却种下日后香港楼市似坐火箭爆升的过犹不及「惨况」。
　　
可能冇人记得孙明扬的「托市辣招」，等我与大家重温「孙九招」啦。
　　
一、取消拍卖土地，暂停勾地一年；
二、暂停港铁房屋项目投标一年；
三、公屋兴建由需求主导；
四、即时结束居屋计划（逼买私楼）；
五、为低收入家庭及公屋居民提供免息贷款计划（大家去买楼啦）；
六、即时结束私人参建居屋及房协资助自置居所计划（交返畀私人市场搞）；
七、终止出售公屋（要买就私楼）；
八、放宽业主收楼权；
九、取消内部认购限制（大家一齐炒啦）。