【曾智华专栏】大刑侍候何泽尧

周三本栏大字标题《田鸡开餐》，结果田鸡并冇连场入位，幸而小弟畀的四只，跑出「英雄豪迈」，W派九十五元五角，若大家每匹买十蚊鸡W，也有五十几蚊盈利，算系咁嘞，总之开开心心有得玩、有得赢！
　　
当晚大新闻，当然为华人骑师一哥何泽尧被竞赛小组重罚停十场，指佢策骑「喜至宝」终点前垂手，故大刑侍候。
　　
奇在呢场佢W出㖞！好多马迷摸不著头脑，点解赢马都罚呀大佬？
　　
这事引起我极度好奇，遂再三翻睇巡逻影片。小弟的分析，竞赛小组其实并不单单针对小何终点冲线前垂手咁简单，而是针对佢根本由出闸开始，全程冇斗心及决志去尽搏，因一出闸已漏，然后「柔性」策骑跟跑。其实只马沿途自己想冲，虽然何泽尧无拉，但肯定终点前一百米前冇落骑功。大家可翻睇佢最后骑法比对其他骑师，尤其骑「雅典武士」的潘顿！
　　
呢场根本不应平头，而是「喜至宝」应SureWin。再三观察，似乎何泽尧「另有谂法」，在多个Close Up镜头下（只有竞赛董事睇到，普通马迷冇得睇），自然现形！
　　
重罚绝对合理，但是否判十日就可公开议论。但睇嚟上诉都冇用，因就算你W出，小组都可以咁快咁狠下判决，必定掌握充足理由。
　　
明日何泽尧有不少坐骑，肯定会醒醒定定嘞，因有案底在身，若再畀竞赛小组捉正，咁就后果堪虞矣！佢其中一只马应热透，乃第七场的「年少有威」，靓档兼跑同程未输过，更又操又试闸，然后嘭嘭声报名。即想点？即同日同马房（罗厩）应有过关马！边只？我睇「为您钟情」及「越骏欢欣」最似样，两皆有备而来，摆明配合出招！