【曾智华专栏】月薪三十几万元笋工

放长假，逐一翻阅平日未睇完的旧报章。
　　
睇睇吓，咦过瘾，有一份三十几万元月薪笋工（包括基本薪酬、各种福利及约满酬金），正在打锣揾人（或早已有人选，纯走过场？），10月18日截止报名！
　　
好奇之下，胆粗粗自己问吓自己，能否符合资格去马应征，都几好玩！
　　
呢份正是「香港特别行政区平等机会委员会全职执行主席」（职衔水蛇膥咁长）。
　　
好！照吓镜睇睇掂唔掂：
　　
一、香港特别行政区永久居民（百分之百及格）。
　　
二、具良好教育水平（假假哋香港大学公共行政系硕士，掂）。
　　
三、对推广平等机会，以及建立一个兼容、没有壁垒的和谐社会，有强烈承担（未够强烈，但肯定有承担）。
　　
四、有最少十五年公共行政、专业服务或私营机构高层管理的相关经验（都应该过到骨嘅）。
　　
五、有清晰远见、持正不阿（应该不比绝大部分现职高官差），具出色的领导才能，拥有成熟的行政及公关技巧（中上咁啦）。
　　
六、在香港公共机构或社会服务方面，具备丰富经验（又全中噃）。
　　
七、具有出色的语文及沟通技巧，中英文水平优良（做咗四十几年传媒、开咪三十年，若冇沟通技巧及语文水平，早早去咗「堆填区」啦）。
　　
呢份工因强调「平等机会」，故完全不提年龄、性别、性倾向、种族、健康状况……非常之「政治正确」。不过，你知我知，会唔会真系唔考虑应征者以上的一切呀？玩咩！
　　
例如，若我去马，一个唔觉意中咗，会真系可以成七十岁，成个老翁咁款出任？观感上似乎有点唔妥㖞！谂落自己玩完「照镜」，都系唔好多手申请嘞，否则中咗咪死？必定吓到抑郁症复发，累街坊呀！