【曾智华专栏】「方程式」又中到应

乜嘢「方程式」？本栏马迷读者必知，也应赢到盘满钵满，正是小弟再三强调的赢钱方程式——高班让磅马少＝爆冷。
　　
今季有三次这种情况，三次皆全爆冷。上周六我又指明三级赛「庆典杯」必爆无疑，因只得六匹马跑，当中「直线力山」非短途马，摆明凑兴热身。另外，告东尼出三只，揸硬庄，佢想点开都得，但肯定必爆！
　　
果然，爆出最冷的「健康愉快」，九倍W，今铺真系笑甩牙，简直难以置信！
　　
点解难以置信？因只马牌面又高分又劲，兼且罗富全当朝畀马房「例汤」贴士，用佢行头，显示信心十足，咁都竟然变全场最冷，难明！小弟当然以佢做二重彩复式胆啦。一于飞起「直线力山」，再拖四只，投注八十元，结果派二百六十元，再赢多十蚊鸡W，又派九十元！
　　
早前我曾在本栏话畀罗富全「例汤」（马房贴士）渌亲，今次一铺返晒来啦，哈哈。
　　
当日另一只马也与我有关，正是圣若瑟书院一班旧生夹份的「坚又威」。真系福有攸归，因马主们许诺，每次赢得的奖金，皆拨出部分行善。结果只马出五次，两W一Q，奖金丰厚，弱势社群大大受惠也。
　　
不过，今次潘顿摆明跑错，搞到入直路后要打到只马飞起，才赢短头，耗力甚多。相信有排才能回气喇。
　　
今晚快活谷跑九场，季初报名马疏落，马会竟仍拆九场，相信是为拉长时间，配合政府「夜缤纷」。
　　
今季练马师，最威者是「威哥」吕健威，次次有马赢，刚刚又杀三场，龙虎榜上远远抛离其他对手。好多人唔明，点解会咁劲？
　　
我都唔明，不过一定要跟！提供WP「水晶酒杯」，从未在快活谷出赛，但靓档兼操到嘭嘭声，试闸W出，明刀明枪！