【曾智华专栏】大话西游再西游

电影创作上当然可以天马行空，但也不可完全脱离基本逻辑及人性，否则就会变离晒地得啖笑。
　　
离场时，隔篱阿叔总括套戏的评语最到肉：「咁都得？你讲鬼晒佢啦！」
　　
日常与人辩论，若对方打横来，完全唔讲基本道理，只想赢，咁我必放弃无意义纠缠，只好抛下一句：「咁呀，你讲晒佢啦！」然后撤退，免伤和气。
　　
我讲紧边套戏呢？正是过去两个月，在内地大收特收，票房已达36亿人仔的《消失的她》。此片已成今年票房季军（咁都得？）。
　　
事实上，电影拍得相当不错，男女主角靓仔靓女，摄影师也是高手，多场美景，尽显功架。
　　
此外，近几年不少内地制作可能导演「浸过咸水」，故拍出来的感觉，有一定「国际味道」，不似早年般老套（一睇就知内地片）。尤其能够适当时候加入欧西名曲衬托画面，增加非中式的浪漫美感。
　　
不过，以上全皆包装。一套好电影仍是要讲灵魂——剧本！否则就如一个靓女，著到周身名牌而冇内涵，一开口即输晒。
　　
《消失的她》又如何？开头极吸引，描述一对夫妇到美丽小岛度假，但妻子突然无故失踪，翌日丈夫起床时，发觉一位完全陌生的女子睡在旁，认系佢太太。追查落去，由护照到身体疤痕皆「珍珠都冇咁真」，但丈夫就百分百肯定，此女子非老婆！
　　
如此开场，的确引人入胜。不过，弊！到中段已开始大话西游，每五分钟有一个乱来「创造」，兼且越来越离晒大谱。发展下去，编剧变「神」，喜欢点变就点变。到最后完全无厘头搞个——哦，咁都得（？）剧情做结局。喂，套片有原著㗎，边会咁骑呢㗎？