【曾智华专栏】空则变，变则通

老友F约会，有密实嘢倾，唔方便去系人都见到的餐馆，于是约去一间刚开半年新会所，佢话冇乜人，相当静局的「新窦」，名HKGTA Town Club。
　　
「喂，我真系闻所未闻㖞，唔知识唔识去㖞，要着乜衫㗎？会否似Hong Kong Club咁，规矩多多，又要摄恤衫入裤头，又唔准讲电话，又唔准着波鞋及冇领衫⋯⋯㗎？」为免出丑，我问定先。因试过几次在其他高级会所，畀经理细细声呼唤：「曾先生，有电话揾你啊，出一出嚟听啦。」其实系指我唔啱规矩，故主动又借皮鞋，又借领带，又借外套，以符合非常严谨的会所规则。
　　
F一听：「易啦，畀个介绍你睇睇！」
　　
原来呢间会所成立不久，就在中环新世界大厦二十四楼。咁嘅卡士，当然用英文介绍啦：Hong Kong’s Newest And Most Sought-After Destination, An Oasis of Understated Luxury for Individuals。
　　
哗，个写手好有创意噃，可以咁介绍。
　　
睇落去， 哈哈， 认识两个生字！ 因此Club标榜有「World Class Chefs, Sommeliers and Mixologists」！Chef我识，其他呢？速查字典，原来乃侍酒师及调酒师，即此乃饮靓酒之处。
　　
日子到，杀上去，电梯门一开，已见几位身材高大亮丽女接待，非常有礼引领进入。
　　
装修当然设计高雅，重本出击啦。
　　
F递上Menu说：「碌Sir，你自己睇睇喜欢食乜啦！」
　　
如此格局，谂住晚餐千五元一位冇走鸡。点知唔系，小菜约二百元，套餐三百几元及六百几元，好「刻己」噃，咁⋯⋯可能会费好甘都未定！再了解下去，点解呢间Club于半年前出现呢？
　　
F话：「形势使然！过去两年大量甲级商厦空置，点搞？于是使出一招——空则变，变则通。因中环金融精英劲多，有庞大需求揾高档架步倾业务或休息松弛，呢间Club咪应运而生囉。听讲专攻年轻行政人员！」