【曾智华专栏】公屋妹向上流

罗淑佩升任房屋局常秘兼任房屋署署长，接受《头条日报》访问，即变成头条新闻，读之相当有趣，因佢冇乜「老官僚味」！
　　
一般传统高官一系好鬼恶死，例如昔日的曹广荣、杨启彦、曾荫权、任志刚⋯ ⋯ 因为精英心态爆表，看下属（间中上司也如此）经常是「俯视」——你班友识乜吖，当然窒人唔使本。
　　
另一种则是不做不错，少讲少错，几大唔表态。逼住要表态，就只讲既定立场Line To Take，多句都唔会漏出口，极之滑不留手。
　　
发展到今时今日又如何？你话呢？
　　
小弟觉得比较有趣为三位女高官：一、发展局局长宁汉豪；二、房屋局局长何永贤；三、房屋局常秘罗淑佩。
　　
宁汉豪年轻时冇戴眼镜，温文青秀。唔知点解做局长后，成日戴深色胶框眼镜，「老师化」晒。凡发言，口吻就似向小学生解释或在𠱁大家，百分之一千冇官味，只将市民当小朋友，绝对少见！
　　
何永贤最擅长笑，你系传媒或议员，想砌佢，真系好难，因佢一副与人为善形象，你攻击佢？一定自己输先。
　　
至于罗淑佩，大情大性格局，面对困难颇有拍住心口就上的气魄。佢系最佳访问对象，因够放，冇官款。例如一开口就形容自己为「屋邨妹」，呢个形象绝对受落。香港起码有一半人做过「屋邨仔」或「屋邨妹」，故此他日罗署长到屋邨视察时，与居民沟通就多份亲切感。
　　
事实上，数百万香港人皆屋邨长大，也因有基本住屋安全感，才能放心在学业及事业上打拼，慢慢向上流。不过，完成向上流之后，有的自愿让回公屋给需要者，有的则死都霸住。且看罗署长点游说「富户」愿为社会大利益做点事了。