【曾智华专栏】我话唔得就唔得

香港过去二十多年来，出现不少「大白象」级大型建设，全部蚀到香港人眼坦坦，兼且运作上又一镬泡。其中佼佼者，当然是启德邮轮码头！
　　
十多年前码头开始兴建，小弟见到最高高官的决定，觉得非常唔妥，早在电台及报章「大声疾呼」——喂，咁搞一定唔掂㖞，好大手尾㗎！
　　
讲乜？因作为长年公务员，我绝对理解公务员心态，包括：一、只按章则做事；二、唔好搞乜乜Think Out OfThe Box，最安全因循，不做不错，多做多错；三、冇兴趣牟利，因揾钱自己冇份之余，一掂钱就易被指贪污；四、尽量与商界保持距离，以免被屈「官商勾结」，又或明益某某商业集团。基于上述四项，故此凡要求公务员「经营」与商业有关的运作，必会搞成一镬泡。
　　
最典型例子，早年所有公共屋邨商场归房屋署管，结果变成点？资深市民必记忆犹新——乌灯黑火，溶烂破落，衞生奇差，管理混帐，保安员爱理不理，甚至开工蛇咗去。
　　
点解？正因冇动力去改善也。结果政府支出大大而收益细细，遂把心一横，全部打包上市甩掉！
　　
讲返邮轮码头，若由商业集团营运，肯定未开张已先搞掂周边交通配套，方便客人临门。做旺个场后，财源自然滚滚，码头变受欢迎旅游点，日日搞娱乐演出、举办展览会及嘉年华等。
　　
商业集团一切以盈利挂帅，CEO交唔到数，会被踢屁股再炒鱿，反之，大把花红分！
　　
如今由公务员管理？冇生意咪冇生意囉，十年前如此，十年后也如此，你吹乒乓乎？
　　
究竟边个决定启德码头唔外判畀商营集团呢？正是当年最大权𠮶位。有权真过瘾，力排众议：「我话唔得就唔得！」