【曾智华专栏】亲海駅震撼连锁反应

李嘉诚系乜人？神级人！当然，佢投资一百次，仍会有几次失误。不过，纪录证明，诚哥弹离所有人甚远，包括几大地产商！
　　
佢睇市之准、出手之快，绝对令人望尘莫及，故才能赚最多、蚀最少，长期坐硬香港首富位置，冇乜边个能埋身。
　　
尤其摸透香港地产及经济大趋势，故经常可以摸顶出货。近年放售中环中心及半山豪宅波老道两役，已足以令人叹为观止！不过，接佢货的「精明投资者」则惨矣，个氹不知几时才可填得返。
　　
上周李嘉诚又雷霆出手，油塘靓盘，一劈就两成，低过二手楼价出货。
　　
这招隐隐见到1998年故技，火速将翠盈半岛一Q清袋。当年香港地产市道遇上金融海啸，由平均价七千几元一呎滑落到六千多元。当所有地产商都在慢慢出货时，诚哥当机立断，肯定大冧市即将来临，一出手就劈到四千几元一呎，立即将所有购买力索清光，搞到其他大孖沙眼光光。
　　
事后才知几犀利，楼市果然一沉不起，跌啊跌，跌到2003年沙士期平均2,600元一呎才摸底。
　　
如今油塘附近大量启德及观塘新盘，仍在企硬1.8万元至2万元一呎。二手楼也在拉锯，冇乜成交，因卖家仍有「良好愿望」，故在等大巿调整。
　　
好啦，你哋唔识睇，等超人教你睇啦。佢咁嘅价钱出手，等于觉得现货只值1.4万元一呎。呢个价，若又畀佢抢先一Q清袋，咁其他新盘及二手盘就有排挨喇，因购买力再次清仓也。
　　
反之，若1.4万元仍未能全部清货，咁诚哥必定减完再减，总之要货如轮转！
　　
亲海駅今次自己锄价，带来的连锁性影响，将会非常之大。发展如何，好睇过睇戏！