【曾智华专栏】又一个中招

有老友批评小弟成个长气佬咁，某啲嘢讲完一次又一次，烦唔烦啲呀？
　　
唔烦唔烦，帮到人就唔烦！例如我最近变成「当红骗子」，突然网上涌出N咁多个用真相的网页，话开免费投资班，教人发达。
　　
本来我真系怕烦，费事理佢。点知出吓多啲，出吓又多啲，咁就烦都要嘞，日日在社交平台澄清、踢爆、猛劝人咪上当。
　　
讲咗上千次，仍有人留言：「碌Sir，呢个系咪你呀？若不是，快啲澄清啊，报警啦！」
　　
报警？成个星期前已做咗，落晒口供，警方科网安全组专人跟进，非常之认真处理。
　　
另外，我当然不厌其烦继续澄清啦。
　　
劝人，从来不是小弟杯茶。
　　
不过，若果见到你踩氹，又问到我，当然照正答啦！
　　
刚刚又有财经记者来电问：「近来经济咁差，应该投资乜呢？有咩生意好做呢？」
　　
「第一，经济差，去投资？请问你乜嘢逻辑？你可知投资根本不等于赚钱，反之，十个投资，无论系乜，九个蚀本，尤其你唔识⋯⋯撼个头埋去学人做生意，唔畀人呃至奇，肯定蚀到鸡毛鸭血。尤其是艺人及医生，在自己行业揾钱易，以为其他行业都系咁，当然畀啲『棍』及『蛇』睇中，游说你搞生意，再从中赚你钱啦！」
　　
「系㖞，刚刚ERROR队长肥仔投资的高级日式餐厅，半年就执笠，蚀咗唔少钱㖞！」
　　
「系囉，我讲咗冇一百都有几十次，话明艺人投资餐厅，十之九九必定血本无归。简单，你又忙又唔识业内的蛊惑招，交托畀人搞，当然大量『棍』及『蛇』埋你身，尽快吸晒你啲血啦。你以为做明星会好多粉丝帮衬，太太太天真喇。粉丝也是精明消费者，你啲嘢唔得，点会嚟第二次呀？肥仔虽然执得快，但唔使身家输光晒！」