【曾智华专栏】串串贡，句句中

童年时，最喜欢拉爷爷衫尾入戏院，睇关德兴做主角的《黄飞鸿》系列。目的有三：一、凉冷气；二、睇黄飞鸿警恶惩奸，将衰人石坚打到一仆一碌，维护正义，大快人心。
　　
仲有就系第三，睇黄飞鸿窒到西瓜刨扮演的牙擦苏飞起，真真娱乐性丰富。
　　
窒人，其实好冇礼貌。不过，若是见到有料者出言窒到应，又几过鬼瘾，大快人心。
　　
周初在一个金融经济论坛中，就正正见到素来「串串贡」的行政会议成员及前金管局总裁任志刚，毫不畀面，串到财经事务及库务局局长许正宇飞起。
　　
一开波，「银发任」已摆明睇唔起「许弟弟」。因老任经已74岁，佢入政府时（1971年），小许仍未出世（1976年出生），以任志刚咁心高气傲性格，叫我同你平起平坐讨论财经金融？唔玩你就唔系「金融沙皇」啦。
　　
结果，一场类似黄飞鸿窒牙擦苏的论坛，就在众目睽睽下展开嘞。小弟有众多老友在场亲睹，真系笑爆嘴，尤其老任窒小许：「我乜乜物物时，你都未出世啦！」
　　
不过，老任串还串，真系句句中。尤其不屑政府未完全搞清楚啲虚拟嘢系乜，就力推发展虚拟金融资产政策。
　　
任志刚摆明有备而来，整个氹畀许正宇踩，个氹正是一条问题：「话我知，虚拟资产点样可以支持到经济？」
　　
咁环境，小许当然畀老任气场压扁，答到一口泡。于是，自然被食住上教训。
　　
讲真，我绝对同意老任睇法㗎。佢话：「所谓虚拟资产，连支持其价值的真实资产都未见，资产负债表又冇，如何支持实体经济？我一定唔会买虚拟资产，因为唔知佢背后系乜？咁都买，不如去赌场买好啦！」
　　
真系串串贡，句句中！