【曾智华专栏】同一条鞭，时软时硬

嗱嗱嗱，各位咪心邪啊！今日的标题，乃正正经经讲鞭！乜鞭？是握在冠军骑师潘顿手中的马鞭。究竟佢几时「硬」、几时「软」？真系得佢自己知，所有捧场马迷，绝对吹佢唔胀。

大家都畀佢玩到陀陀拧！上周日跑十场，佢坐骑竟然有八只大热！

究竟是否全港马迷、马评人及「外边投注者」皆懵到上心口，乱咁买呢？结果八只之中，只得两只一点四倍的「永远美丽」及「金钻贵人」胜出，派彩加埋唔够买半粒惊风散。

小弟一再强调，如今香港跑马，真系任阿「软硬鞭」（我替佢起的新绰号）开。真跑又得，梦游又得，狂揪又得，轻扫又得，犀飞利。大家可以赛后重温佢「软」同「硬」有乜唔同。简单，你留意佢落第的几只大热演绎方法，相比入Q的「骄阳明驹」，就可以扎醒，叹句：「哗！原来可以咁大分别嘅⋯⋯服晒！」

论骑师，艾道拿似乎开始慢慢适应香港模式，由走位到斗最后一百米，比起初抵埗时，有明显进步，可继续留意。

上周日赛事，睇住《赛马日在线》，其中一幕好搞笑。因「零零亨」见到「坚又威」有几十人扶老携幼落沙圈，提示大家捧多少场。其实呢匹马乃母校圣若瑟书院大群旧生的「坚又威赛马团体」（Green and White）夹分引入的。每次出赛，个个似参加嘉年华，全部成员家家空群而出，当然，更人人有理冇理真金白银狂掟，结果次次赔率与胜出机会不成比例，变捐款。

今晚要留意方仔两只。第一只「黑桃火箭」，报名时写何泽尧，真上阵是布文，上铺陈嘉熙只能入Q，今次不可再误于庸手矣。第二只为「独角兽」。上次戴文高铲入第三，今次即换田泰安，三档，够钟收割！