【曾智华专栏】杀得过瘾，打得开心

喂喂，我究竟是否变态？杀人会过瘾？打人会开心？冇变态，珍珠冇咁真！
　　
早前小弟在此表示，凡入戏院睇《杀神》系列及《狂野时速》系列，皆会中途离场。不是对影片有甚么不满，而是睇杀人杀到滞及飞车飞到闷，够皮，再睇落去变反高潮，于是立即拜拜，反正磨落去也不会再有甚么惊喜。
　　
不过，若是睇李小龙或者甄子丹扮演陈真及叶问，则套套睇到完，直至最后一分钟。
　　
同是打打杀杀，《杀神》及《狂野时速》超级大制作，点解杀到中途就失去吸引？你话呢？
　　
上周四一套新片上画，我又依例第一时间仆去睇长者早场。2017年及2022年皆如是，今次第三次，正是捧韩国正义大只佬马东石场，睇佢嘅《犯罪都市》系列，今次为《铁拳扫毒》。听讲若受落，系列会拍八集。今年肥马52岁，若拍晒，60开外矣。
　　
《犯罪都市》冇飞机大炮科技或大阵仗战斗及飞车场面，其实来来去去卖一个正气正义肥佬刑警，点解咁收得？
　　
简单分析，电影之内人物不似现实，全部忠奸分明，忠人得胜，奸人被杀或被打到开花，大快人心也，这正是梦工场能做得到的。
　　
睇马东石打坏人，过瘾到极。因佢虽肥大超重，但非常灵活，拳风虎虎，睇得出真材实料，力拨千斤。加上剧本及对白过瘾，而肥马则永远木口木面，有强烈戏剧效果。
　　
另一元素为玩反差。一如黄飞鸿片及叶问片，师傅威晒，相对的徒弟，个个甩皮甩骨，故每次见师傅骂人，观众皆大乐。
　　
戏内马东石班马仔，个个儍吓儍吓，非常有喜剧效果。再拼埋中、日、韩黑帮全部衰晒，大快人心。
　　
睇完，开开心心离场！