【曾智华专栏】马会派钱

网上论马节目N咁多，各有特色，小弟比较喜欢睇「马评元老」张福元论述。

张兄写马评马几十年，风格不变，坚持的也不变（认为啱的一套，会信奉几十年）。

佢写马无大娱乐性，但出镜就不同。老张充满英国绅士风格，从不动气大骂或情绪激动，永远冷冷（静）的，兼且经常用幽默感指出一些坊间谬误，讲时皮笑肉不笑，过瘾。

上周又睇佢拆解遮打杯一级赛，知识性及娱乐性满满，非常可观。

佢眯眯嘴同拍档讲：「呢场马会派钱啦，边有得跑呀？只得两只跑，位置Q赢硬，派11蚊马会都蚀！仲有，『将王』分分钟赢『浪漫勇士』，因后者根本未跑过2400米。相反，『将王』曾在卡塔尔及香港赢过国际一级赛！」

早前不少「业余」分析认为「将王」5月初跑2400米，明显输畀「直线力山」两个几马位，应是去完外地作赛后只马Down咗。

呢点张福元又有佢独到透视式看法：「上场根本不是目标，遮打杯先系！上次跑让磅，今次跑平磅，一来一回，『将王』赚返十几磅，『直线力山』边有得跑呀？呢场一定单Q！」

我听完之后信服，于是跟足先买单Q，再买复式二重彩，「浪漫勇士」搭「将王」，然后重锤位置Q，睇睇马会可唔可以跟足张福元神仙棒——派钱？

结果，开！冇得唔服，果然「将王」呢场脱胎换骨，回复真身，终点前杀低「浪漫勇士」。

摆明单Q，但连赢派近40蚊，二重彩派139蚊，「冇得输」的位置Q，并非如老张估计派11蚊 ，而系接近20蚊！

上周日全捧戴文高WP，七只只有一P，瘀晒！

今晚佢「夫卜」，练马师们大欣赏。好，再WP多一次：「包装大奖」、「盛世名驹」、「至尊高飞」、「高高」及「无敌精英」。