【曾智华专栏】食药Vs.唔食药

年纪大， 机器坏。我辈同龄男人行埋时，多会互相交流大家有几多种病、食几多种药。
　　
最为普遍，当然为血压药及胆固醇药，两者愈来愈优质，也不觉有乜明显不良副作用。
　　
就如小弟，一九九五年开始服用，转眼已近三十年，简直已当正常「餐」的一部分。
　　
出事一次为二○一五年，误以为经已退休，压力大减，故自动减血压药。结果，三个月内出事，血压未能控制在正常水平，终于搞到眼中风，医餐懵。右眼至今仍未完全康复，幸而冇恶化，已感谢主！
　　
食药，不同人有不同心态及感受。
　　
昨日与旧同事晚宴（食多一次得一次，因个别唔系移咗民去外国，就系移咗民上天堂），话题又系食药。过瘾，出现南辕北辙的决定。
　　
「高佬W」够钟出现前列腺问题，小便唔畅顺，点搞？医生开特效药。W哥一食，副作用吓人，不时血压过低、冇食欲、手软脚软、神志大受影响，驾驶时虽可勉强集中，但一回到家就泊位即撞墙，立即通知医生。
　　
「W先生，咁啦，试第二只药！」医生冷冷咁回应，惯性反应，似乎冇乜紧要。
　　
好，又试第二只。大件事，上述情况更甚，W哥成个人变成冇晒心机。
　　
点搞？大丈夫自己决定——放弃食药！
　　
结果唔食药立时「打回原形」！即胃口好咗，人精神返，血压正常，体力恢复。唯一是回复小便冇咁畅顺，间中「滴滴仔」，但平衡利害，唔食（药）好过食！
　　
另一老友「气势S」则相反。糖尿病，医生要佢戒口戒酒，否则好难好返。S哥人生最大乐趣为大吃大喝交际Social，你叫佢戒？即同医生讲：「我绝不戒口！有冇其他方法控制糖尿病？」
　　
「食双倍药囉！」医生回应。结果？双倍就双倍！