【曾智华专栏】高铁略欠基本公关

通关后，高铁又再出现一票难求现象，证明这个服务非常受欢迎，也非常之有需要。
　　
点解？快及准！若果坐飞机，会因这样那样问题，又唔升得，又唔降得。遇上天气不佳又或工业行动、员工换唔切班等等问题，必定Delay又Delay，甚至取消航班，真系闲过立秋！搭飞机，就要有心理准备遇上麻烦突发事件，故此，不少人若抱着食得咸鱼抵得渴心态去搭，就要买定保险矣。
　　
高铁又如何？绝对可以撼低飞机，故此，愈来愈好生意，正常。不过，系咪真真又快又准咁坚？
　　
唔好彩，小弟上周就遇上「唔系咁快又准」遭遇，与高铁狂卖的形象背道而驰。
　　
我成团人买齐票，下午三时三十分由广州南返港，下午二时三十分坐定定，大安旨意下午四时三十分可抵港。
　　
点知，哗哗，唔系啩，起初航班牌打出延时，即系Delay啦。咁鬼好天，又唔听见有乜大意外，整乜Delay呢？当然冇人解释。
　　
旅行，最怕遇上计划中的一切有差池，尤其半天吊状况，实在令人不安、坏情绪！
　　
投诉无门问苍天乎，唯有等啦。个几钟头后，更大镬，竟然打出「班次取消」。
　　
哗哗，咁就大件事嘞，成团人点返香港？咪话高铁又快又准又舒服嘅咩吓？
　　
死火！点解冇人解释乜原因，话取消就取消？然后又冇安排另调航班，又或派吓餐券安抚情绪，老奉就咁算数？大佬，唔多似样㖞。
　　
终于我哋团长「和哥」决定唔再戆居居等到天长地久，立即指示领队到售票处退票回水，然后自己安排旅游巴，两程接驳返港。
　　
整件事，我真系唔知高铁咁大间公司搞乜，冇向乘客道歉，冇安排其他班次或巴士，唔该大家「食自己」，系咪欠缺基本公关呢？