【曾智华专栏】巴西好手鸡飞狗走

骑师受贿贪污、参与赌博、与外围有联系、拉马造马⋯⋯乃全世界马场皆有发生的事，见怪不怪，因为——冇至奇！

只因金钱的引诱太大了，所以，拉完一个又一个，坐（监）完一个又一个，以上情况仍会「生生不息」。以往如此，现在如此，将来也会如此。简单，有钱的地方就有贼。金钱世界孕育骗子，乃「永恒真理」。

故此，当上周爆出波健士及苏兆辉涉赌，大家不会很惊奇，只会以「哈哈，又捉到两个噃」的猎奇心态观之。

稍稍「奇」的，为点解又系巴西佬？因为𠮶头刚刚莫雷拉神神秘秘称伤告退，改玩「周游列国」策骑外，乡里马雅又话拜拜。然后最新一对巴西孖宝断正，真系⋯⋯有冇咁巧合呀老友？
　　
综合小弟各线路人马睇法：

一、波健士根本乡下仔一名，也不擅英语，交际圈子甚细，易受摆布。最儍系佢完全唔知马会保安部的「神通广大」，竟敢明目张胆下注。

二、波仔一定以为「竞骏光辉」上铺沙田马场百几倍爆大冷，在自己胯下跑第二，今次应该第一喇啩？其实上铺入Q，今次仍有十八倍，即系「冇飞」啦，正懵仔。

三、只马佢偷偷落咗注，再自己骑都跑到一坺咁，输几个马位，证明眼光及骑功皆屎到痹。

四、本来波仔生生性性，间中会有练马师畀马佢爆，例如蔡约翰就久不久来次「波蔡」组合杀马，如今冇呢支歌仔唱嘞。

五、上周五各马房倒泻箩蟹换骑师，所以「骑师王」开唔到盘。奇在「练马师王」照开，难道马会操盘手认为边个跑，赛果都一样？有趣！
　　
今晚二班千二米，「嫡爱心」热晒，我轻注「巴萨诺瓦」撼低佢，大马主萧氏家族拣手货，外地四战三W一Q，劲嘢！