【曾智华专栏】平嘢冇好？

传统智慧，平嘢冇好，好嘢冇平！
　　
系真唔系真？真咗八成啦。唔使辩论，人生经验自然会话你知，当一样嘢「太平」，去到Too Good To Be True时，咁你就要小心啦。正所谓边有咁大只蛤乸随街跳？
　　
尤其食海鲜。小弟认识的鲤鱼门海鲜店老板肥B，酒后拉我讲：「碌Sir，千祈咪信靓海鲜有平嘢呀。想平？得！食『游客海鲜』囉！」
　　
乜叫「游客海鲜」？即系平价团游客食的海鲜。
　　
「嗱，一手海鲜来，通常分三级状态。第一级，新鲜生猛；第二级，呆呆哋，未死，但有多少『慢走』，应该𠮶头近；第三级，唔系海鲜，系神仙，即系瓜咗。做生意，样样都讲钱，用得当然唔掉。神仙海鲜，用大量调味品，胡椒粉、鸡粉、盐、梳打粉⋯⋯ 总之搞到佢冇腥味，然后上脆浆炸之，再加酸甜汁，如此，鬼佬游客一定食到嗒糖㗎！」
　　
今日标题讲「平嘢冇好」，若放在马圈又如何？
　　
个个马主都要决定将马畀边个马房训练，若你单单以为贵就一定好，平就水蛋，咁就大错特错啦。
　　
例如今季的包尾练马师苗礼德，在全港马房收费方面（二十二个马房），竟排最高第五！难怪佢啲马不停拉仓嘞，烧鹅价钱蔗渣味道也。
　　
咁又有冇蔗渣价钱烧鹅味道呢？有！正是练出「金鎗六十」的吕健威马房，真系抵到飞起，收费排尾二，第二十一，平到呢⋯⋯
　　
明天母亲节，赛马不是大过天，一定要让路，否则好多丈夫会被扭耳仔！
　　
今日最瞩目港澳杯，一班跑千四米，大群「老对手」又再碰头，究竟「永远美丽」有冇机再W？但W出赔率必冇味！
　　
我会改捧「线路之星」，因今次与「永远美丽」再多三分差距，兼且告东尼乃「葡国仔」，胜出港澳杯有另一重特别意义！二重彩复式胆！