【曾智华专栏】超级扰民过关程序

港珠澳大桥建成后，一直拍乌蝇，恶评如潮。每次我坐船到珠海，见到呢条天文数字建成的「冇车用」宏伟建设，都感到极可惜，极想深入了解为乜「搞成咁」。
　　
趁大假过后，约二十位退休老友，组团到顺德寻找美食，刻意来回取道港珠澳大桥。
　　
人人试过一次后，应了解为乜佢拍晒乌蝇，咁靓都冇人用，终于去澳门珠海宁愿搭船，去内地其他城市宁愿搭高铁。
　　
其中（话明其中，因可能另有我未理解的）一个主要原因，乃是过关设计烦到抽筋，超级扰民，程序有一半根本绝无需要。
　　
用港珠澳大桥过关，要先在香港口岸前落车，拖着行李冒着寒风（冬天），身水身汗（夏天），徒步先过香港一关。行呀行，小弟亲眼见到不少长者，为悭钱参加平价团，也经此关。但睇见大群老人家，或扭吓扭吓脚软软，或要用枴杖缓慢行，或根本要坐轮椅，拖着行李，先经第一关挨几百米，再上上落落大旅巴。
　　
然后过大桥，去到珠海，又再重复上述程序，都唔知为乜？简直就似「玩」班老弱过关。客观睇——毫无需要！
　　
负责的大官，请企出嚟解释，呢个超级扰民过关程序，为乜唔精简到变「一地两检」？有乜做唔到？使唔使民间智慧教你点做？
　　
之前就话好多「反对派」阻头阻势啫，如今「良政善治」，一切政府政策点会过唔到？你睇睇高铁过关几方便？仲有边个会反对「一地两检」咁戆居？
　　
若冇，唔该快快落实，等呢条「大白象桥」可以发挥基本作用！
　　
内地四处皆见宣扬营造人民的「幸福感」。但当我见到老弱伤残身水身汗过关时，即想问两地入境处大官：「这里何来幸福感？」