【曾智华专栏】捧莫雷拉变返莫雷拉

莫雷拉，对全港马迷及马评人来说，根本是一个谜，一个大家都好想拆开，重重疑团的谜。
　　
千祈咪赖人阴谋论，又指乱噏乱咁估，只因「莫雷拉事件」全无透明度。我几次兜口兜面问马会不同高层，个个眼神若有隐藏，不便言明咁款。咁情况，你要人唔「乱」猜度，咁仲有言论自由嘅？
　　
呢呢，今次又神奇嘞。根据「雷神」（近日佢的演出，的确变返神级）老友黄兴桂透露，佢会略带「神秘」地今晚才抵港，立即由马会专车「护送」去酒店休息，然后明天出现马场，嘭嘭声跑完，又再火速由马会专车（车上有冇保镖？）「护送」到机场，即晚要走。
　　
咁嘅安排，你咪话我疑心大嘞，小弟乃「资深传媒人」，我哋嘅专业训练，以及师傅早早教落：「千祈唔好人哋讲你就信，尤其官方言论，必须查根究柢，要有证有据！」所以，我绝对唔接受莫雷拉用好忙做借口，就此仆到咁嚟、仆到咁走！
　　
尤其佢又话自己有伤在身，咁为乜唔悠悠闲来，先唞几日，跑完再悠悠闲Hea几日，先返巴西？既然已经名利无忧，巴西又有大农场，更冇一个地方马场可以绑住佢，火烛车咁来去，同佢声称的身体状况唔多脗合㖞。
　　
究竟马会为乜如此安排呢？小弟怀疑有个「大势力」，唔想/畀佢接触其他人，尤其传媒！以免你班友仔问吓问吓，问出尴尬「真相」！
　　
讲返马。既然莫雷拉变返「雷神」，以佢的神级骑功，根本冇人够佢挥。
　　
所以，明日投注策略，我全部买雷神过关，然后攞住放大镜睇（欣赏？）佢每场演出，如何表演「艺术性」骑法。
　
一个如此有天分骑师，背负著一个无法解开而人人「误会」的谜，可惜呀！