【曾智华专栏】可否洗牙「罚款」代替？

朋友之中，谈到打针，十个有九个都怕。我又怕唔怕？当然怕！但当无法避免时，就要顶硬上。因为每年最少抽两次血检验，此外，又要打这样那样的疫苗。
　　
不过，比打针更怕的是见牙医，因为凡坐上佢张椅，就似上行刑电椅，因一连串酷刑，多会即将展开！
　　
小弟遇上人生最大镬、最没齿难忘、最剧痛一次，为十多年前，因有只蛀牙，排期去睇政府医生。
　　
众所周知，政府牙医十之七八新仔新女，全部毕业冇几耐之新手，当然唔会熟练。
　　
医生仔问我：「先生，你有蛀牙要补，要先磨开个窿，然后填水银。你想唔想打麻醉针？」
　　
第一次畀人咁问，懵吓懵吓答返佢：「咁呀，打同唔打有乜分别呢医生？」
　　
「哦⋯⋯唔系个个都想打嘅，有啲人宁愿忍痛，避开麻醉针痛，到底麻药都会有点副作用。」佢木口木面答。
　　
「咁唔打嘞！」呢句说话一出，真系驷马难追！佢立即开动电钻，飞快向我个牙窿大力钻。
　　
大家试试想像，只牙被蛀已经痛，而内里又藏咗咁多神经线，如大力钻落去，会有几大生理震撼呢？
　　
事后与试过想顺产又出唔到BB的前孕妇分享，这正是人生之最惨烈的「十级痛」。
　　
冇夸张，真系痛到标汗又标尿咁滞。不过，既已上电椅，难道选择逃亡咁衰仔咩？
　　
自此有教训。有机会打麻醉针的话，几大主动提出要求！另外，那次经验也令我产生先天性「牙医恐惧症」，每次坐上电动椅，就会极度不安。
　　
昨天再到期洗牙，又系牙医开动吱吱声唔知电磨定电钻，搞到我又赤又痛。佢一边开工，我个心就一边自己问自己：「哈，究竟呢种酷刑，可否用『罚款』来代替的呢？」