【曾智华专栏】要交代，大压力

上周本报内页大标题，写上《太古广场3000呎单位月租37.7万，林郑办公室首年开支1350万》。
　　
可能标题太「震撼」，当朝步入惯常的草根茶记，竟见两位的士大叔就此作讨论，面红耳热上晒心。其中首先发言的，有点躁底，十足十《白日青春》里的黄秋生，造型百分百神似。
　　
肥叔：「唓，有冇搞错啊，都落咗台啦，又冇乜重要公职，使唔使用千几万元一年办公呀？究竟有乜公办，要几个人全职服侍，再另加三千呎地方呀？大佬，系人都知大量㓥房户，每人连三十呎栖身都冇啦。」
　　
矮叔：「肥佬，条气唔顺都冇计㖞，例系死嘅，早早定低晒（塘边鹤：「系呀，畀几多我哋有声出咩？」），规定佢可享有一切，除非政府自己都觉得离谱，主动修改啦。」
　　
肥佬：「制度死嘅，人系生嘅，你试吓行出街问吓任何市民，有冇人觉得一位前特首要如此奢华形式继续办公吖！」
　　
矮叔：「又系嘅，唉……千几万之中，有六百几万用咗嚟装修买家具，我有个做装修老友睇过个单位，笑笑口话：『今匀有行家发达嘞！』林郑办公室报告话佢过去几个月做咗百次推广性活动㖞，又香港又海外市场及录影进行，哈，究竟内容系乜呢吓？」
　　
肥叔：「老老实实，如今林郑真系有啲『困境』㗎，好在冇晒民主派咋，否则，必定畀人日日问责，要求交代份工点样衡功量值，直到烦死佢为止！讲开又讲，究竟『前特首』呢份工有冇得辞职嘅呢？既然佢公开访问时，喊住表明话希望做返个普通人，做返丈夫的太太，以及做返两个儿子的妈妈，若真有如此心愿，就应朝呢个目标进发啦⋯⋯ 」