【曾智华专栏】无记应该把心一横

做传媒最忌偏听，因为所有人都有自己利益立场（政治、机构、宗教、教育……），若你听佢哋某一组人讲嘢就以为真，咁唔该你返归瞓觉！
　　
所以，对任何现象都应打开双眼、擘开双耳，再用识见、智慧及常识去分析问题。
　　
单讲传媒，一般人论及报章、电视及电台时，不少藐藐嘴话：「乜仲有人睇报章、睇电视及听电台嘅咩？」
　　
佢哋有冇错？一般般。若啱晒，以上媒体早已消失啦。对，如今因科技及环保关系，极多媒体百花齐放，唔得的当然淘汰。
　　
但报章有冇生存空间？会否被电子版取代？简单，坊间几份报章有免费网上版，但奇，实体版仍大量印刷，尤其周五。个别更奇，是大量读者宁愿畀钱买实体版，已唔睇网上免费版，点解？唔该自己用脑分析。
　　
到周二、周三、周五及周日，内附马经的综合报章及纯马经，实体报章更大卖特卖！
　　
讲讲电视。事实，TVB风光不再。不过，当你听见人有点嗤之以鼻款话：「唓，乜如今仲有人睇无记节目嘅咩？Out晒啦！」
　　
讲的当然自己冇睇无记节目，但佢哋以为冇人睇无记，也未免有点无知。事实TVB仍是最多人收看的电视台，而且久不久就爆出个「王牌节目」。例如近月的《中年好声音》，你可知几劲？收视二十四点，即超过一百五十万人睇！
　　
其他电视台节目，根本难望其背。点解？无他，因TVB仍有大量「初老拥趸」。呢群粉丝口味喜欢怀旧，而且随着人口老化，阵容愈来愈庞大，整个走势，不容忽视。
　　
声明，小弟不是TVB粉丝，但客观分析，无记应全力主攻初老市场。理应把心一横，唔好再把持不定十五十六，走去扮潮扮青春，乜都想要唔Work㗎！