【曾智华专栏】由「英俊九」到「九爷爷」

「权力是男人的春药」，这句说话，在历史上印证了N次。请看看克林顿及奥巴马，做总统是怎样的英明神武或意气风发。
　　
今天？尤其奥巴马，仅仅六十一岁，经已成个干晒，满头白发，完全唔系路！
　　
喂，话晒都系前美国总统吖，点解唔执执佢？难道冇咗权力真系会谢成咁？
　　
睇睇现任总统拜登，虽然行动迟缓，少少震吓震吓，但佢大奥巴马十九年，仍起码可以日理万机，冇畀人一个残样。
　　
再睇睇下周一将赴内地「祭祖」（点解加引号？当然此乃借口而已）的马英九，套用一位曾经拜倒佢的女性朋友R形容：「真真令人心碎，点解搞成咁？」
　　
本来R乃百分百马英九粉丝，由佢上世纪九十年代初出道，任台湾法务部部长时，已开始迷，再经历过出任台北市长、国民党主席，R的热情不但冇减，反之不断高涨。
　　
终于马英九在2008年出选台湾最高领导人大位，R更组织旅行团，沿途追踪。刚巧我当年也到咗台北趁热闹，正正遇上马英九到夜市拉票。哗，犀飞利，简直劲过天王巨星出巡，不少女粉丝不停尖叫，更飞扑埋去拉扯，欲拥抱之。
　　
小弟站在远观，也觉群情汹涌合理。因当年的「英俊马」青靓白净，温文尔雅，充满书卷气，也有少少羞涩之款，怎不迷死人？
　　
不过⋯⋯一任，两任之后，立即露出力有不逮之感。
　　
加上被政敌围攻，手段无所不用其极（理所当然，This is politic，Stupid！），结果，佢就由光荣上场，灰头土脸落场，也慢慢变为「路人甲」，粉丝不再，崇拜者远离而去。
　　
最新面貌，只七十二岁，已经皱皮秃头双眼无神，气场大失，咁款去内地，肯定畀人带住游花园！