【曾智华专栏】叶刘必再「成功争取」

姜是老的辣，你班新丁议员，真系要学嘢！
　　
小弟讲边个？嘻嘻，当然是我的「偶像」叶刘淑仪啦。你睇，阿姐在政治上几时出招，招数如何，睇准边个，力度几大，全部精于计算㗎。
　　
周一《星岛日报》头条，又畀叶刘顺利顺手拈来，抢尽所有曝光。因为佢度出精句，够晒抢Fo，老总当然照用啦——《叶刘轰５巴大加价「官民共愤」》。
　　
五家巴士公司夹埋向政府施压，捆绑一齐提出加价，加幅开天杀价，相信一定过唔到。但开到咁高，就算「落地还钱」，点都有多少揸拿！
　　
可能一众巴士公司以为立法会「完善」后，会好相与，凡事「得过且过」，唔会猛力反对。
　　
点知刚刚估错！立法会冇咗班民主派后，系呀，所有政治议题及政府施政主张，一定好Easy就通过，因「上有政策」，冇人敢「搞搞震」也。这方面，北京及特区政府相当放心。
　　
不过咁，做得议员，当然不能事事摆出「乖乖猪」款，一定要「为民请命」的。如此，瞓身锄落去边呢？当然是民生议题。
　　
呢方面，叶刘超晒班。因为：一、佢乃行政会议召集人，冇个官敢唔畀面；二、做过高官，完全知道政府运作、管理心态及痛点；三、多次成功民选，对市民渴求，绝对掌握。
　　
有齐以上三项，其他政客点同佢斗？
　　
上次阿姐要求增加马会足球博彩税，小弟在此早早声明，必定「成功争取」，中到开巷。
　　
好嘞，今次又如何？一定又畀佢搞掂。因运输局根本唔敢将巴士申请加价原封不动呈交行政会议（记住，叶刘为召集人）。咁点呀？Regina讲到「官民共愤」咁大，你仲想去马？冇啦，低低哋躀一铺，收返个申请，再度过啦，鬼叫你唔识「政治」，出招前又冇摸底咩。