【曾智华专栏】某人被闹到反肚

边个畀人闹到反肚？被闹的，不但一啲都唔嬲，兼且笑到见牙唔见眼，掩嘴狂笑！

未讲边个之前，讲讲今季打吡大赛。马迷十个有九个中唔到Q、二重彩、三重彩及四重彩（Q派1,940元，二重彩派5,908元，三重彩派18,580元，四重彩更惊人，派489,899元）。

三、四重彩是否很难中？理论上唔系，因为小弟一类资深马迷，早就知道呢场大赛「蔡氏宗亲会」出五只，绝对操控大局。

结果正正三重彩占两只，四重彩更占三只！咁点解冇人能中到正？因为W出的一只，爆超级大冷，乃四十六倍的「遨游气泡」。

呢场马系冇得唔服姚本辉的部署及巴度的演绎，此马本来是放头马，次次赢皆如此。好啦，基于今场排十四档，喂，边有可能放头呢？

放头马不能放头，即系输咗九成！

理论上，当然如此。不过，开闸！喂喂，乜「遨游气泡」竟然留住唔放，将长力于中段才使出，到最后五十米，爆到尽，擒下两大高手莫雅的「自胜者强」及潘顿的「永远美丽」。

呢场「蔡氏宗亲会」一定呕血，因为本来设计，W、P、Q、PQ，再二、三重彩，全部𡁻埋的，如今竟冷不提防畀一只赛前冇人睇好的大冷杀晒，呆咗！

结果呢场W出的练马师姚本辉就「屋企人有难」，因为赛后畀无数圈外人M到反肚。点解？因为佢赛前发放的马房贴士，竟然提都唔提「遨游气泡」，咁⋯⋯即系点先？当然畀人闹又好，笑又好——喂，使唔使咁收埋食呀，衰仔！不过，辉哥当然笑住收晒，因赚咗N百万元啊！

今晚又玩快活谷。我好想睇潘顿点演绎「前死敌」韦达（做骑师时）弹畀佢的「宜春辉煌」及「电气骑士」，两皆特擅千二米，但抽十一档，考牌也！