【曾智华专栏】打吡大赛选两胆

马季又一高潮，明日展开！一级赛女皇银禧纪念杯，搞笑，只得五匹参加。意即爬返嚟包尾都有奖金！点解其他马有钱都唔执？报名跑，当晨操试闸都好吖。
　　
马圈乃一个离离合合的地方，本来「福逸」一直是巴度的私家马，而佢与法国同乡练马师高伯新长年老友鬼鬼。今次突然易配改畀莫雅骑，巴度呢场则坐冷板凳，发生乜事？
　　
讲讲打吡大赛，总奖金二千四百万元，冠军独占一千三百多万元，喂，跑一个圈返嚟，若赢就千几万元落袋，你系练马师，你系骑师，你系马主，心态会点？仲唔搏甩髀，将最后一滴潜藏能量都爆埋出来？
　　
今届打吡，可以有好多爆冷因素。首先，所有马皆未跑过二千米，意即无数据可参考。只只最长跑千八米，千八米与二千米，步速与气量有所不同，故此千八米得，二千米未必得。
　　
另外，当然高分的「玛瑙」着数晒，比起最低分的「一代天娇」，相差十九分，赚到尽。跑平磅，理论上冇得跑！
　　
不过，你知我知，冇人会之前将参战马实力，在打吡大赛前畀晒你睇的。意即必定有冚手，大家无法摸清对手底牌，只会在打真军时揭盅！一日未开闸，一日都是军秘！
　　
呢类赛事，当然买顶级大骑师。难道重要大赛，幕后会假手于嘉里、霍宏声或希威森呢类卡士人马咩？若佢哋得，就唔使天价请莫雅等国际殿堂级巨星嚟啦。
　　
呢场应是「蔡氏宗亲会」揸庄。「永远美丽」或「自胜者强」W。但为保底，我会要埋「知足常乐」及「新力高升」。一于四只二重彩复式，再买一注「永远美丽」及「自胜者强」复式胆，脚拖「知足常乐」、「新力高升」、「喜旺驹」及「直线力山」！