【曾智华专栏】笑爆嘴公关策略

周三有乜全城笑话？当然系某某港女，突然走咗去日本做女优，大拍咸片，然后幕后班玩家高手，竟然度出条绝世好桥，胆生毛公布话获得杨润雄局长的恭喜。喂喂，
杨局长代表乜？正是代表香港文化、体育及旅游！
　　
呢个作风大胆的港女，唔知背后有乜师爷，总之非常食脑兼作风夸张，更绝对懂得利用网上冇乜管制的空间，先而真空上街四围散步，将片段掟上网，吸引好奇者（咸
虫？）眼球。
　　
当然志不在此，而是食大茶饭，最终目的杀入日本AV界，改个日本名，大锣大鼓宣传来自香港，成为讲广东话的女优，并加盟东洋AV大集团Faleno Star。
　　
一连串部署，相当出色，早早吸引到「咸湿界」在网上轰传其「真空游街」片段。
　　
我有冇睇过？当然有。其时已肯定呢条片乃Teaser，更加重点目标即将曝光。
　　
你问小弟有冇兴趣？真的，冇乜。因觉此女无论气质与样貌非常平平，难言吸引。
　　
但点都谂唔到，佢可以玩到咁大。
　　
偏门人物应该活在偏门世界，政府再猪猪都唔应该与佢哋「平起平坐」。
　　
尤其呢剂，女优及其背后师爷，摆明借政府过桥，将「文化局长」拉落水，制造Noise Level。
　　
喂喂，究竟政府有冇专业公关㗎？面对呢类「屎桥」，竟要出官方声明澄清，然后再报警处理？哈哈，咁真系百分之一千「正中下怀」啦！
　　
结果，女优成棚人求仁得仁，立即因特区政府报警，成为国际新闻人物，红到爆玻璃。然后，Faleno Star个Server，因无数咸湿佬涌入而Down爆机咁滞。
　　
一切一切，乃最佳宣传及反面公关教材。
　　
宣传，极品高手出招。应付的公关，就真系⋯⋯唔该特区政府快「闭门思过」啦！