【曾智华专栏】ChatGPT能贴赛马？

人，就是喜欢一窝蜂，也喜欢将新事物吹到无限大，尤其涉及虚拟的、科技的，因为之前未出现过，故绝对可以「老作」！

你可以话我属「老套怪」，因为凡新嘢出现，一定不会瞓身投入，反之，先旁观一下，睇班友搞乜鬼，尤其涉及投资的，几大唔落叠，宁愿有放过冇杀错。

就此，逃过不少蚀本之劫。久而久之，创下一个投资口号——新嘢留返畀新仔玩。因为新仔（年轻人）可以仆到即弹返起身，仆完又仆冇所谓，唔死得就可以。

但退休人士千祈咪制！即如跌倒，可能断手断脚断盆骨，未必驳得返㗎。投资也如是，退休的生活费，千祈咪乱博，听见班合法或非法骗子乱吹你就买，死咗冇人可怜！

最近当然又人人大讲特讲ChatGPT，形容到出神入化，将可取代大量工种，包括律师、医生、会计师等专业职系。兼且用户数量增加似火箭升空，于是有人话已经市值上千亿美元计，认真夸张。

系真唔系真，小弟冇做过研究，唔敢下定论。今次当然也是抱着「睇新嘢」心态，先靠边站，睇睇呢种近乎「全球新厕所」的玩意又如何发展。

不过，讲到咁巴闭，我又好奇问问教授级老友点睇？

佢笑嘻嘻指住个ChatGPT回答画面：「碌Sir，好过瘾㗎，我问佢林郑老公边个，佢答梁振英！我又问佢梁振英老婆边个，佢答梁爱诗！」哗哗，咁都得？同街边吹水阿叔有乜分别呢？只要冇准确资料输入，佢就会乱噏。

当然，马迷最想问佢：「喂喂，今晚边只跑出呀？」若识答，咁就必定颠覆成个马圈嘞。
　　
今晚主攻研究二班一千米，我喜欢「状元及第」及「心之行」，两皆有赛绩支持，排好档，对碰W，再Q、PQ可也！