【曾智华专栏】究竟佢在搞乜鬼？

近日与政治及传媒老江湖春茗，你估最有兴趣话题系乜呢？
　　
简约公屋？错！全面通关？错！特首出访中东？错！错错错之下，究竟系乜呢？
　　
正是今日标题——究竟佢搞乜鬼？呢个「佢」，正是叶刘淑仪。人人皆八卦、皆好奇，究竟佢点解突然抽起条筋「玩」马会，要求政府加足球博彩税，由五成变八成，想攞命咁款？
　　
连带之下，人人又好奇，点解「新界强」刘业强身为香港马会遴选会员，竟然手指拗出唔拗入，走去附和叶刘，明知马会董事局及管理层就呢单嘢激到扎扎跳。个个当然联想到「新界强」早前力争做董事，结果被成担柠檬浸瓜个案，喂，是否「大报复」呀？
　　
近日「财爷波」正密锣紧鼓筹备《预算案》，突然有两个行政会议成员打晒开口牌，要求增加马会足球博彩税，佢好难借咗聋耳陈对耳扮听唔到噃。咁就算应酬吓，可能马会亦将要纳多亿亿声税，更甚此门一开，可能年年都畀人「玩」，变咗惯性就大件事。
　　
马会为香港「权力象征机构」，又有咁多前任及现任高官、行政会议成员做过/做紧董事及主席，对掌握官场文化、谂法⋯⋯当然比一般人深，肯定不会举手投降。
　　
点呢？我估应该咁拆：第一，一人行一步，加多少足球博彩税；第二，政府松章，开放马会足球博彩场次（如今每年万几场，有潜质大幅提升到几万场，似英国情况）；第三，开放其他体育博彩，例如网球及篮球。三样做齐就All Win，政府多咗税收，马会扩阔博彩范围，收回所「损失」的，皆大欢喜。
　　
今晚又有得玩！
　　
主攻高班千二米赛事，我会三只Q、PQ互穿：「紧张大师」、「骏马风采」及「齐齐友福」，大家好运！