【曾智华专栏】有人赢马唔识/唔敢笑

赢马不是好兴奋的吗？点解会唔识/唔敢笑？边个咁违反自然定律呀？
　　
其实呢类场面久不久就见到，正是在拉头马的凯旋门。通常有头马拉，必定呼朋引类，喜气洋洋，大家摆个V字手势，然后马主畀手指公赞骑练「叻叻」，好波！
　　
不过⋯⋯间中呢类场面，虽赢头马而马主冇出现，正是爆出九十九倍大冷时！
　　
九十九倍？乜时候出现呢？正是只马「应该」输硬，练马师自己唔贴，亦叫马主切勿嘥子弹，更多时骑师是水皮冷门一族。加加埋埋，咁就九十九倍嘞，间中更会百几二百倍！
　　
大家想知小弟指边场？容易，揿上马会网，重温年三十第八场，就见证影头马相时，马主、练马师及骑师皆唔识/唔敢笑场面。
　　
马主唔识笑，因觉得走大鸡之余，更觉冇面！自己只马「海岛材子」W得都一嚿云，必畀老友柴台：「喂老林，得都唔通知声，收埋食咁自私呀？」
　　
马主只得苦笑，因被监生「屈」。最巧合，马主个名叫林金钱，相信呢铺肯定金钱「淋」走晒矣。
　　
另一个唔敢笑的，当然为练马师姚本辉。只马一百一十一倍，幸好闸前完全冇「蛊惑飞」，否则……呢场爆胎味极浓，睇巡逻影片，见骑师马雅并冇非常积极推骑，只是只马在直路自己冲W而已。爆到七彩，练马师当然唔敢笑，以免被人怀疑「老点」马主，然后收埋食，真又好，假又好，都要嗱口嗱面冇晒瘾咁款。
　　
「海岛材子」W完今次，有排唔使睇嘞，因加五分要「坐马监」！
　　
拆拆明天万众瞩目董事杯个局，不会三只马王排队过终点咁简单啩？我会用三胜一级赛的老马「夏威夷」做Q胆拖之，睇天下第一高手莫雅表演可也！