【曾智华专栏】通关绝不可「公平」

每日六万人放入十四亿人口国家，根本是微尘几阵。但每日六万人涌入七百万人口城市，尤其集中在广东道、铜锣湾及上水，咁就……一定非常震撼！再者，若全部奔向同一目标——扫药及打针，咁……你话香港点顶？

终于上述的后者根本冇出现。是否内地同胞冇兴趣杀到港澳台？当然唔系。而系一如熟知北京政策的政论家卢永雄指出，此乃中央有序地控制节奏，慢慢一步步来。
事实，几年前当港珠澳大桥通车前，也有人惊到脚震震。因若以对等政策，港澳车可以入内地，内地车也应有「同等权利」，双向来香港，咁先算「平等政策」，系咪？

当时连最最最讲公平理念者，都唔敢宣扬呢个「大原则」，因明知死硬。你香港得几十万部车，就算一成揸入到内地，都系几万，真是微尘几阵。

倒转，内地几千万车，涌百分一来，都有几十万辆，未过桥已压冧成个香港啦，吓嘛？结果有冇发生？冇！因为「公平政策」并没有出现，如此就可保住香港冇冧档！

其实两地政府在月前，早应做多点期望管理，详细列出通关的原则、政策及步骤，咁就唔使令香港搞到人心惶惶，个个走去抢退烧药，生霸死霸啦。

如今宣布仍未迟。本报上周六头条新闻，相当吓人㗎——报复式旅行、逼爆公安局中签注；内地逾百万大军，新春抢游港澳台。

喂喂，唔该官方讲明，呢百万大军究竟系：一、一百万定几百万？二、分别申请目的地去边？几多成想来香港？三、将会用乜方式安排到港？每日每周每月放几多客人落嚟？
　　
究竟我哋是否要扎定马，部署迎接大群「财神」呢？