【曾智华专栏】佢哋做紧/过乜？

两年前，凡任何饭局，都有人提出玩唸名字游戏，唸乜？正是Mirror十二子名字。最热衷参与的，皆为女性，由十六岁到六十岁皆兴致勃勃。绝大部分记忆力惊人，十二个名，一字不漏，全中！
　　
究竟点解佢哋咁犀利？读书、工作，甚至社交时，要记人名，又有冇如此超强记忆力的呢？
　　
多年前香港政坛风起云涌，我哋传媒人，尤其做政界访问的，必会认识所有议员名字、面容、背景、政治取向。当然，边个有料，边个符碌，更了然于胸。对于后者，当然唔会嘥时间揾嚟访问，大胆讲句，我讲好过佢讲（唔使扮谦虚）！
　　
好嘞，发展到如今，选举制度「完善」咗，议员数目又大幅增加咗。咁究竟一般人，包括传媒人，对新一届议员又有几多认知呢？喂！佢哋做咗成年喇！
　　
上周成群资深传媒人欢聚，饮咗几杯，又开始玩记名游戏。今次当然唔系玩Mirror，而系玩应届立法会议员。呢群选举时信誓旦旦，承诺服务社会，为民请命之士，到如今，先不论究竟有几大贡献，但作为政治人物，最低要求，系有人识你，知道你攞咗个投票权加十万元计薪酬，做过乜？老友，千祈咪扮「低调」呀。议员天职乃服务社会，若你「低调」到隐形咁款，市民要求助，难道揾空气？
　　
好嘞，记名游戏开始！
　　
真真死火，旧议员，大家记得七、八成。新议员？真该煨！以下名字，全枱都冇一个记得，亦唔知佢系乜背景、搞紧乜、有乜做过。包括：严刚、苏长荣、谭岳衡、简慧敏、颜汶羽、龙汉标、杨
永杰、黄国、黄俊硕、陆瀚民、郭玲丽、张欣宇、陈学锋、陈绍雄、陈祖恒、陈沛良、陈仲尼、陈月明、梁毓伟、梁熙、梁文广、梁子颖、洪雯、林筱鲁、林素蔚、林振升、林哲玄、周文港、周小松、吴杰庄、李镇强、李惟宏、李浩然、李世荣、朱国强。
　　
你话死唔死？成年嘞，唔好话普通市民，连资深传媒人都唔知佢哋搞过/紧乜？为乜情况会如此？你话呢吓？
　　
是晚结论，只有一个明显跑出而人人都识的，乃江玉欢！